Biznes mühiti və beynəlxalq reytinqlər üzrə Komissiyanın “Korrupsiya və şəffaflıq” işçi qrupunun növbəti iclası keçirilmişdir

05 may 2023-cü il tarixdə Biznes mühiti və beynəlxalq reytinqlər üzrə Komissiyanın “Korrupsiya və şəffaflıq” işçi qrupunun növbəti iclası keçirilmişdir.

Onlayn platforma qaydasında təşkil edilən iclasda Azərbaycan Respublikasının Baş Prokurorluğu, Ədliyyə Nazirliyi, İqtisadiyyat Nazirliyi, Maliyyə Nazirliyi, Hesablama Palatası, “Şəffaflıq-Azərbaycan” Korrupsiyaya Qarşı Mübarizə” İctimai Birliyi, “Cəmiyyətin və Vətəndaş Münasibətlərinin İnkişafı” İctimai Birliyi, “Deloitte Azerbaijan”, “KPMG Azərbaycan Limited”, “Azercell”, “Azerconnect” şirkətləri və digər qurumların nümayəndələri iştirak etmişlər.

İşçi qrupunun rəhbəri, Baş prokuror yanında Korrupsiyaya qarşı Mübarizə Baş İdarəsinin rəis müavini Asəf Sarıkişiyevin sədrliyi ilə keçirilmiş iclasda ilkin olaraq işçi qrupun 2023-cü il üçün təsdiq edilmiş “Fəaliyyət Planı” barədə ətraflı məlumat verilmiş, daha sonra isə aidiyyəti dövlət orqanlarının nümayəndələri tərəfindən həmin “Fəaliyyət Planı”nda nəzərdə tutulmuş tədbirlərin icrası ilə bağlı cari ilin birinci rübü ərzində görülmüş işlər barədə çıxışlar həyata keçirilmişdir.

İclasın davamında Ədliyyə Nazirliyi tərəfindən hazırlanmış müvafiq normativ hüquqi aktlar və “Rəqəmsal İdarəetmə Platforması”na dair geniş təqdimat həyata keçirilmiş, habelə, iclasda iştirak edən vətəndaş cəmiyyəti institutları və özəl sektor nümayəndələri tərəfindən sözügedən müvafiq qanun layihələri və dövlət-biznes-vətəndaş cəmiyyəti dialoqunun genişləndirilməsi məsələləri ilə bağlı zəruri təkliflər irəli sürülmüşdür.

×